香港 輕便鐵路

輕鐵（通車嗰時叫輕便鐵路，有段時間叫九廣輕鐵，法例上重係叫西北鐵路），係香港鐵路有限公司營運嘅香港客運鐵路之一；有 13 條路線；車行新界西北嘅屯門區同元朗區之間，全長 36.15 公里。截至2004年，總共有 68 個站，當中有 5 個站接駁港鐵嘅西鐵綫。輕鐵每日運作 19 個鐘。車隊現時有 119 部列車，每部可以載 200 幾人。12 條路線都有佢嘅代表顏色（另外有一條只係喺繁忙時間行駛嘅路線，即 751P，不過路線圖冇顯示）。至於成個輕鐵網，合併前用橙色代表，合併之後就改用泥黃色代表。

車隊
70架澳洲Comeng輕鐵列車，1988年投入服務（編號1001-1070，其中1004又叫「輕鐵先鋒」，1070又叫「史禮賢」，1013已退役）（第1期列車）
30架日本川崎輕鐵列車，1993年投入服務（編號1071-1090，另外1201-1210冇駕駛室）（第2、2T期列車）
20架澳洲 Goninan輕鐵列車，1997年投入服務（編號1091-1110）（第3期列車）
22架中國南京浦鎮輕鐵列車，2009年投入服務（編號1111-1132）（第4期列車）

澳洲 COMENG 列車同日本川崎列車喺1997年至2000年間翻髹成新色彩（第一架翻髹電動列車編號係1044，1997年秋季完成翻髹；最後一架係1028，2000年秋季完成翻髹），並喺2002年至2003年間以電子路線牌取代沿用咗10年嘅膠布牌路線顯示（第2版），車尾亦加裝咗電子路線牌。

以上嘅車唔係固定喺對應路線行駛，有時會有2架電動列車連埋一齊行，俗稱拖卡，車尾會有一塊寫有C字嘅牌，畀後面列車嘅司機識別。拖卡時可載超過400人。

所有輕鐵列車嘅速度限制每小時80公里，一般營運速度每小時30至50公里之間，只有少數距離較長嘅路段，好似藍地至洪水橋段，車速可接近70公里。車廂大部份座位都面向車頭，只有部份靠近車門嘅座位係倒轉頭。2004年，九鐵公司決定將其中50個車廂嘅部分座椅拎走，留出更多位畀乘客嚟企，工程喺2006年完成。

2007年中，經運輸署調查後，九鐵公司同意買多22架新輕鐵車廂（第4期列車）以應付九龍南線啟用後嘅乘客量增長，並會喺9月中開始招標。而新輕鐵車廂預計喺2009年初前陸續投入服務。喺2007年11月，九廣鐵路公司正式批出22架新輕鐵車廂（第4期列車）嘅合約畀澳洲御萊特集團鐵路服務公司（United Group）。

有關合約已經喺2008年1月25號簽好咗，編號係KRS999。呢22架車由澳洲御萊特集團鐵路服務公司（United Group）負責車身總體設計，南車浦鎮公司負責成架車生產總裝同調試。第一架車會喺2009年5月交貨，其餘嘅預計喺2010年交埋，總額 3 億左右。而家頭兩架車已經行緊751線同507線。